Tirohanga whānui

Ka rongo te Wai 2700 – Te Ruku Tātari ā-Kaupapa Mana Wāhine – i ngā kerēme katoa e toe ana ka whakapae i te whakahāweatanga ki ngā wāhine Māori hei hua o ngā takahi a te Karauna i te tiriti. Ka whātoro atu ēnei kerēme puta noa i ngā wāhi maha o ngā kaupapahere, ngā tikanga, ngā mahi, me ngā hapanga a te Karauna o mua, onāianei hoki, ā, o ngā ture, te whakarato i ngā ratonga, me te āwhina Kāwanatanga hāngai.

I roto i tētahi manatu o te 20 o Tīhema 2018 (Wai 2700, #2.5.8 (hononga o waho)), i tīmata ōkawatia e te hea o te Taraipiunara Te Ruku Tātari ā-Kaupapa Mana Wāhine me te kopou i a Kaiwhakawā Sarah Reeves hei mana whakahaere. I te 7 o Ākuhata 2019, ka kopou te hea i a Dr Robyn Anderson rātou ko Dr Ruakere Hond, ko Kim Ngarimu hei mema o te rōpū ki te ruku tātari. I muri iho, i kopoua a Ahorangi Linda Tuhiwai Smith hei mema o te rōpū i te 23 o Noema 2020.

Korahi o te ruku tātari

I whakaū te Mana Whakahaere i te korahi mō te ruku tātari i roto i te manatu i te 22 o Hūrae 2020 (Wai 2700, #2.5.24(a) (hononga o waho)), ā, ko te pātai kei te iho te whākorekore i whakapaetia o te mana taketake me te iho o ngā wāhine Māori me te whakaparahako pūnaha, te pakukore, me ngā tautika-kore i wheakotia hei hua. E whā ngā pou hei tāpare i te ruku tātari: rangatiratanga, whenua, whakapapa/whānau me te whai rawa.

Ngā nohoanga tūāpapa

I whakahaere te Taraipiunara i ngā nohoanga tuatahi hei whakarato i te tūāpapa mō te ruku tātari whānui. I arotahi ēnei nohoanga ki te tikanga o te mana wāhine me te māramatanga i mua i te wā koroniara o ngā wāhine i roto i te ao Māori. Ka whakaputa ngā rōia a ngā kaikerēme i te ārahi mō ngā kaiwhakaatu i roto i ēnei nohoanga, i tautokohia e te Taraipiunara (Wai 2700, #3.1.312(b) (hononga o waho)). Ko 'Te Arataki' te ingoa. Ka whakatakoto i ngā pātai hei tīwhiri mō ngā kaiwhakaatu i raro i ngā kaupapa e whā e whai ake nei:

Atua whāea me ngā tīpuna whāea me te tauira mō te mana wāhine.
Te ira wāhine me te ira tangata – te hononga me te hangarite o te wāhine me te tāne.
Te mana o te wāhine i Te Ao Māori, te pāpori Māori, me ngā rangatira wāhine.
Te rangatiratanga wāhine i runga i te whenua, whakapapa/whānau, whai rawa me te mātauranga.

Kia whakatūturu i te horanga whānui ā-rohe, i tū ngā nohoanga tūāpapa ki Kerikeri (Pēpuere 2021), Ngāruawāhia (Pēpuere 2021), Whangārei (Hūrae 2021), Whakatāne (Hūrae 2022), Te Awakairangi (Ākuhata 2022), me Ōtautahi (Hepetema 2022).

I te Tīhema o 2023, ka whakapuaki te Taraipiunara i te tuku tōmua o Te Kete Pūputu: Te Tuhinga Ārahi Tuihono ki ngā Taunakitanga o te Tūāpapa Mana Wāhine.

E wātea ana tēnei ārahi hei 'tuhinga hukihuki', kia āhei te whakahou i ngā hapa ā-tuhi, ā-tohutoro a ngā hunga. Ka mutu ana taua tukanga, ka whakarewahia ōkawatia e te Taraipiunara tēnei paetukutuku mā te takunetanga tuihono mō ngā kaikerēme i te tīmatanga o te tau 2024. Ehara tēnei ārahi tuihono i te pūrongo a te Taraipiunara, nā reira, kāhore i te whakaatu i ngā whakaaro o te Rōpū Whakamana i Te Tiriti o Waitangi, kāhore hoki he otinga, he tūtohu rānei e pā ana ki ngā taunakitanga i whakaemihia. Engari, ka kohikohi, ka whakaemi hoki tēnei ārahi i te mātauranga i tuarihia e ngā kaiwhakaatu ki te Taraipiunara, e whakamana ana i ngā kaiwhakamahi kia tūhura i te taunakitanga me te kōrero – tae atu ki ngā kaupapa matua, ngā kī horipū matua, ngā whakataukī, me ngā whakaahua – mā rātou anō.

Hōtaka rangahau ruku tātari

Ka whakaputa te Taraipiunara i te pūrongo tirotiro tūhura i te Hūrae o 2020 (Wai 2700, #6.2.1 (hononga o waho)). E whakaritea ana ngā pūrongo tirotiro tūhura e ngā kairangahau o te Wāhanga o te Rōpu Whakamana i te Tiriti o Waitangi ki te āwhina i te Taraipiunara me ngā hunga ki te whai whakaaro me te urupare ki ngā hiahia taunakitanga o te ruku tātari.

I te Āperira o 2021, i muri i ngā tāpaetanga a ngā hunga, ka whakaū te Mana Whakahaere e kirimanatia ai ngā kaupapa rangahau e ono e whai ake nei e te Rōpū Whakamana i Te Tiriti o Waitangi (Wai 2700, #2.5.49 (hononga o waho)). I te Hune o 2023 ka whakaū te Mana Whakahaere i te kirimanahia o tētahi atu kaupapa e kīia nei ko 'Takapou Whāriki'. He kaupapa rangahau ataata-rongo a Takapou Whāriki e kohikohi ana i ngā kōrero ā-waha a ngā wāhine Māori, taea noatia ērā e whai wāhi ana ki te Ruku Tātari Mana Wāhine.

E ahu whakamua ana te hōtaka rangahau i kirimanahia e te Taraipiunara, ā, (i te Hepetema o 2023) kua whakaritea kia oti ngā pūrongo hei te Hūrae o 2024.

Tirohanga whānui, 1840-1950

Te mana tika me ngā manarite-kore i te oranga mō ngā wāhine Māori, 1950-2000

Te āhei o ngā wāhine Māori ki ngā tūnga whakakanohi, hautūtanga, 1990-2020

Ngā take manatika onāianei mō ngā wāhine Māori, 1990-2020

Te mātauranga onāianei me ngā take whai mahi mā ngā wāhine Māori, 1990-2020

Ngā take ohaoha onāianei mō ngā wāhine Māori, 1990-2020

TAKAPOU WHĀRIKI

Tērā ētahi kaupapa rangahau mō te ruku tātari Mana Wāhine e rangahaua motuhaketia ana i te Rōpū Whakamana i Te Tiriti o Waitangi. Kei te huawaeretia ēnei kaupapa rangahau tāpiri mā te Mana Wāhine Joint Research Committee.

I whakatakotohia ngā kupu tohutoro mō te komiti Rangahau Ngātahi i te Ākuhata 2020, ā, ka whakarārangi i ngā whāinga e whai ake nei:

Kia whakatūturu e whakatakotohia ana te rangahau matawhānui, tino kounga ki te pūranga tuhinga mō te ruku tātari ki te tautoko i ngā kerēme.
Ki te taunaki i te rangahau ina hiahiatia ana ki te tautoko i ngā kerēme.
Kia whakatūturu e pai rawa ai te whakamahi i te pūtea o te Karauna hei koke whakamua i ngā pānga o ngā kaikerēme i roto i te ruku tātari.
Kia tirotiro i te whakaputanga o te rangahau kaikerēme mō te ruku tātari.

I te Oketopa 2022, i whakatakotohia e te Komiti Rangahau Ngātahi i ngā tuhinga kaupapa mō te Rangatiratanga, te Whenua me Te Ao Tūroa, te Whakapapa me te Whānau, me te Whai Rawa.

I te Hānuere o 2023 ka kirimanahia e te Komiti Rangahau Ngātahi i a Dr Naomi Simmons ki te whakarite i te pūrongo Tūroa/Whenua, i a Dr Kirsten Aroha Gabel ki te whakarite i te pūrongo Whakapapa/Whānau. Ka whakaritea kia oti ēnei pūrongo e rua hei te 24 o Tīhema 2024.