Ka whakaū te Taraipiunara i te reo Māori hei reo taketake, hei reo ōkawa hoki o Aotearoa, waihoki he taonga nō te iwi Māori me tētahi reo e uaratia ana e te motu[1]. Ka tautoko te Taraipiunara i te whakakōrero o te reo Māori e ngā kaiwhakauru katoa i ngā tukanga a te Taraipiunara (tae atu ki ngā mema o te Taraipiunara, ngā kaikerēme, ngā rōia, ngā kaikōrero me ngā hunga e whai take ana) ā, i roto i ngā tuhinga ā-pepa me ngā ihirangi ā-waha katoa (tae atu ki ngā tāpaetanga me ngā taunakitanga). Ka tīmata te Taraipiunara ki te whakaaro e whakamahia ana te reo e ngā kaikōrero ki ngā nohoanga, ā, ka whakarato i te kaiwhakawhiti reo Māori ki te whakarato i te whakamāoritanga tukutahi i ngā takunetanga a te Taraipiunara.
Ina whakatakoto ana ngā hunga i ngā tuhinga ki te reo Māori, kāore rātou e herea ana kia whakarato i te whakapākehātanga, heoi anō, ka tonoa rātou i te tuatahi kia pērā, mēnā e hiahia ana rātou kia noho tā rātou ake whakapākehātanga ki te pūranga o te ruku tātari. Ki te whakatau te hunga hāngai, te kaikōrero rānei, e hiahia ana rātou ki te tuku i tō rātou ake whakapākehātanga, me wawe te whakatakoto ki te Taraipiunara. Ka whakaurua te whakapākehātanga ki te pūranga o te ruku tātari me te mea taketake i roto i te reo Māori.
Ki te whakatau te hunga hāngai, te kaikōrero rānei, kāore e taea, kāore rātou i te hiahia rānei ki te tuku i tō rātou ake whakapākehātanga, me wawe te whakamōhio atu ki te Taraipiunara. Kātahi ka whakarato te Taraipiunara, me te akoako ki te hunga hāngai me tana rōia, te whakapākehātanga o te tuhinga. Ina whakaotia te whakapākehātanga, me whai wāhi te hunga hāngai kia arotake i te whakapākehātanga mō te tika, ā, ka āhei te whakarato whakahoki kōrero. Ka whakaurua te whakapākehātanga ki te pūranga o te ruku tātari me te mea taketake i roto i te reo Māori
[1] Te Ture mō Te Reo Māori (Māori Language) Act 2016, wehenga 3(2)(a)
[2] Kei te wehenga 7(3)
Source: Guide to Practice and Procedure for the Waitangi Tribunal 2023 (Te Reo Māori), page 46