Hītori o te Rōpū Whakamana i Te Tiriti o Waitangi

I whakatūria te Rōpū Whakamana i Te Tiriti o Waitangi i raro i te Treaty of Waitangi Act 1975.

Nō te waitohutanga o te Tiriti i te tau 1840, he maha ngā amuamu a ngāi Māori ki te Karauna kāhore ngā kupu o te Tiriti i te tautokohia. I te nuinga o te wā kāhore i rangona ngā petihana me ngā mautohe e ngā taringa turi. I te tau 1877, ka kī tētahi kaiwhakawā ko te Tiriti he 'mana kore ā-ture' I ngā tekau tau 1970, i te piki haere ngā mautohe Māori e pā ana ki ngā nawe Tiriti kāhore anō kia whakatikahia, ā, i ētahi wā e mahia ana i waho o te ture.

Nā te whakatū i te Rōpū Whakamana i te Tiriti o Waitangi, i whakarato te Pāremata i te tukanga ā-ture e taea ana ngā kerēme Tiriti te whakatewhatewha. Ka tāpae ngā ruku tātari Taraipiunara ki te tatūtanga o ngā kerēme Tiriti me te whakamāriretanga o ngā take e tū tonu ana i waenga i ngāi Māori me te Karauna.

Pānuitia ētahi atu kōrero mō te whakatau i ngā kerēme i raro i te Tiriti o Waitangi (hononga o waho)

 Kua pūrongorongo te Taraipiunara i ngā take maha, mai i te reo Māori me te tūāwhiorangi reo irirangi ki te wai māori, te hī ika, te takutai moana me te hauora me te kāinga kore o ngāi Māori.

He maha ngā tūtohutanga i roto i ngā pūrongo i whakatinanahia e ngā kāwanatanga. Kua tāpae ngā pūrongo ki ngā hinonga me ngā whakanōhanga hou maha, tae atu ki te reo irirangi Māori; Te Taura Whiri i te Reo Māori; me Te Māngai Pāho, me Te Aka Whai Ora.

I te tuatahi, e whaimana ana te Taraipiunara kia rongo anake i kerēme mō ngā mahi a te kāwanatanga o te wā. I te tau 1985, i whakaaetia e te Pāremata kia whakatewhatewha te Taraipiunara i ngā takunetanga mai i te tau 1840.

He rau maha ngā kerēme o mua i tukuna. I whakarōpūtia e te Taraipiunara ēnei kerēme ki ngā takiwā, ā, e mōhiotia ana te rangahau i ngā kerēme i roto i te takiwā tauwhāiti me te nohoanga hāngai hei ruku tātari ā-rohe. Kua tata oti te hātepe ruku tātari ā-rohe, ā, i te tau 2008 i whakakorengia e te Pāremata te mana o te Taraipiunara kia rēhita i ngā kerēme aronehe hou.

Ngā mea i whakatutukihia e mātou

Ka kitea ngā mōhiohio hou e pā ana ki ngā mahi a te Taraipiunara i roto i ana pūrongo ā-tau, e tukuna ana i ia Matariki. 

Pānuitia te pūrongo ā-tau hou a te Taraipiunara

I te tau 2015, i whakanuitia e te Rōpū Whakamana i te Tiriti o Waitangi tana huri tau whā tekau. I taua wā, nā te Taraipiunara i:

• rēhita ngā kerēme 2501
• pūrongo i te katoa, tētahi wāhanga rānei o ngā kerēme 1028
• tuku ngā pūrongo whakamutunga kotahi rau, e rua tekau mā toru
• tuku i ngā pūrongo ā-rohe i kapi ai te 79 ōrau o te whenua o Aotearoa.

Pānuitia ētahi atu kōrero i roto i te tukunga 69 o Te Manutukutuku, i tāngia hei tohu i te huri tau whā tekau o te taraipiunara.

Te Manutukutuku putanga 69 [PDF, 2.5 MB]