Ka mutu ana te ruku tātari me te pūrongo a te Taraipiunara i tētahi kerēme, e āhei ana ngā kaikerēme te tono ki tētahi nohoanga whakatikahanga ohotata. He nohoanga motuhake tēnei e tiro anake ana te Taraipiunara ki ngā whakatikahanga e wātea ana ki ngā kaikerēme.
He aha ngā mōhiohio e hiahiatia ana?
Ka whai whakaaro anake te Taraipiunara i tētahi tono mō te nohoanga whakatikahanga ohotata mēnā kei ngā kaitono tētahi pūrongo nā te Taraipiunara i whakataua e whai kiko ana tā rātou kerēme, ā rātou kerēme rānei.
Ki te hiahia koe ki te tono mō te ruku tātari whakatika ohotata, me whakarato koe i ngā mōhiohio e whai ake nei ki te Taraipiunara:
· Ngā take tauwhāiti e hiahiatia ana te nohoanga ohotata.
· Mēnā e hāngai ana te tono ki te katoa o te kerēme, rōpū kerēme katoa rānei, e hāngai ana rānei ki tētahi wāhanga o tētahi kerēme, rōpū kerēme rānei;
· Mēnā e rite ana ngā kaitono kia rangona, tērā rānei me whakamahi, me whakaoti rānei ētahi rangahau i te tuatahi;
· He mōhiohio mō ētahi rangahau me rangahau i te tuatahi;
· He tangata, he rōpū rānei e whakapono ana ngā kaitono me whakamōhio e te Taraipiunara nā te mea e pāngia ana rātou e te tono; me
· Ētahi atu mōhiohio e hāngai ana ki te tono.
Me whakaatu e koe:
· E whakataumahatia ana ngā kaitono, he nui rānei te tūponotanga e whakataumahatia rātou rānei, i te tino whakahāweatanga putanga kore hei hua o ngā mahi onāianei, ngā mahi e heke mai nei rānei a te Karauna;
· Kāore he whakatikahanga kētanga, i roto i aua āhuatanga, e tika ana kia whāia; ā
· E rite ana ngā kaitono kia haere ohotata atu ki te nohoanga.
Me tuhi ēnei mōhiohio, ā, me waitohu e ngā kaikerēme katoa ki te kerēme i whakaingoatia. Ina taea ana me tino tauwhāiti. Ka whiwhia ana ēnei mōhiohio, ka aromatawaia. Ki te hihiatia ētahi mōhiohio anō, ka whakamōhiotia koe.
Te tuku i tō tono
Me tuku koe i tō tono ki te Rēhita me tētahi tārua ki te Karauna.
Rēhita
Wāhi noho pōhi:
The Registrar
Te Rōpū Whakamana i Te Tiriti o Waitangi
SX 11237
Te Whanganui-a-Tara
Īmēra: WT.Registrar@justice.govt.nz
Crown Law Office
Wāhi noho pōhi:
Treaty Issues and International Law Team
Crown Law Office
PO Box 2858
Te Whanganui-a-Tara 6140
Waea Whakaahua: 04 470 4407
Īmēra: treaty.issues@crownlaw.govt.nz
Ka ahatia i muri iho i tō tono
Ki te whakaae te Taraipiunara e urupare ana ngā mōhiohio i hoatu koe i ngā herenga i whakahuatia i runga ake, i te nuinga o te wā ka whai wāhi atu te Karauna kia urupare ki tō tono. Hei whai ake i te urupare a te Karauna, e whai wāhi ana koe ki te tuku i te urupare whakamutunga ki te Karauna.
Ka whakataua pea tō tono i runga anō i ō mōhiohio ā-pepa, tērā pea he kōwhiringa kia tuku tāpaetanga ā-tinana, mā te waea rānei. Ka mutu ana te kōrero a te katoa, ka tuku te Taraipiunara i tana whakataunga mō tō tono.
I mua i te whakataunga, ka whai whakaaro pea te Taraipiunara mēnā e pai ana ngā hunga ki te tatūtanga kē, pērā i te hui ōpaki, hui takawaenga ōkawa rānei.
Ko te paearu e whakatakotohia e te Taraipiunara
Ina whakaaro ana te Taraipiunara kia whakamana i te tono mō te nohoanga whakatikahanga, kāore rānei, ka aro atu te Taraipiunara ki ētahi tūmomo āhuatanga. He tino hira mēnā:
· ka āhei ngā kaikerēme te whakaatu e whakataumahatia ana, he nui rānei te tūponotanga e whakataumahatia rātou i te tino whakahāweatanga putanga kore, ki te kore e tū tētahi nohoanga whakatikahanga.
· kāore he whakatikahanga kē, i raro i ngā āhuatanga, e tika ana kia whakamahia e ngā kaikerēme; ā
· ka āhei ngā kaikerēme te whakaatu e rite ana rātou kia haere wawe ki te nohoanga.