Tirohanga whānui

Te Rau o te Tika: te Ruku tātari mō te Pūnaha manatika (Wai 3060) he ruku tātari ā-kaupapa e rongona ai ngā kerēme katoa e pā ana ki ngā nawe e hāngai ana ki te pūnaha manatika me te whakahaerenga o te manatika. Mō ngā mōhiohio e pā ana ki te pūtea e wātea ana mō rātou e hiahia ana kia whai wāhi atu, tirohia te paetukutuku a te Tāhu o te Ture (hononga o waho)

Te ahu whakamua o te ruku tātari

I te Āperira o 2022 ka whakaū a Kaiwhakawā Wainwright ka ahu whakamua te ruku tātari i runga i te tūāpapa wāhanga me te kaupapa.

1. Whakatika ki Runga

Ko Whakatika ki Runga, he ruku tātari iti ki tā te Karauna tautoko ā-pūtea i te whai wāhi a ngā kaikerēme ki ngā hātepe o te Taraipiunara o Waitangi (tae atu ki te āwhina ā-ture), te wāhanga tuatahi o te ruku tātari, ā, kua oti ināianei. I te Mei o 2022 ka whakaū a Kaiwhakawā Wainwright i ngā pātai kia uruparehia i roto i Whakatika ki Runga (tirohia Wai 3060, #2.5.9(a) mō te rārangi pātai).

I whakahaeretia ngā nohoanga e toru e whai ake nei i waenga i te Hūrae me te Oketopa o 2022:

Nohoanga tuatahi, mai i te 18 ki te 22 o Hūrae, ki Pātaka Art + Museum, Porirua (ngā tāpaetanga whakataki o ngā kaikerēme me ngā taunakitanga kaikerēme)
Nohoanga tuarua, mai i te 12 ki te 16 o Hepetema 2022, ki ngā tari o te Rōpū Whakamana i Te Tiriti o Waitangi (te nuinga ko ngā tāpaetanga whakataki me te taunakitanga a te Karauna)
Nohoanga tuatoru, mai i te 3 ki te 7 o Oketopa 2022, ki ngā tari o te Rōpū Whakamana i Te Tiriti o Waitangi (te taunakitanga e toe ana, me ngā tāpaetanga whakakapi o te Karauna me ngā kaikerēme)

I te Pēpuere o 2023 i whakaputaina e te Taraipiunara i tana Report on Whakatika ki Runga, a Mini-Inquiry Commencing Te Rau o te Tika: The Justice System Inquiry e pānuitia ai ki konei (hononga o waho).

I te Ākuhata o 2023, ka whakatakotohia e te Karauna tētahi manatu e whakahua ana i ngā mahi i mahia tae noa ki tēnei wā hei urupare ki ngā tūtohu o te Taraipiunara (tirohia Wai 3060, #3.2.230, Wai 3060, #3.2.230(a) & Wai 3060, #3.2.230(b) mō tēnei manatu me ana tāpiritanga).

Report on Whakatika ki Runga, a Mini-Inquiry Commencing Te Rau o te Tika: The Justice System Inquiry

2. Te Tūāpapa o Te Tika

Ko te wāhanga tuarua o te ruku tātari ko Te Tūāpapa o Te Tika, ā, e tata ana kia oti. Ko Te Tūāpapa o Te Tika he ruku tātari kia:

Whaimōhio me te whakawhānui i ngā māramatanga o te Taraipiunara ki ngā mātāpono taketake o te tikanga me te manatika e whakatakotohia ā muri ake i roto i te ruku tātari; me
Āwhina i te Taraipiunara kia mārama me pēhea te whakahaere i te ruku tātari kia whai i ngā tikanga.

I te Tīhema o 2022 ka kirimanatia e te Taraipiunara ngā pou tikanga e whā (he mātanga tikanga) kia āwhina i te ruku tātari (tirohia Wai 3060, #2.3.1 mō te manatu-kupu whakahau e kirimanahia ana ngā pou).

I waenga o te tau 2023 ka whakahaere te rōpū me ngā pou i ngā wānanga e whā kia rangona te hapori Māori e pā ana ki ngā take i runga ake. Ka tū ngā wānanga ki ngā tauwāhi e whai ake nei puta noa i te motu:

Te Mānuka Tūtahi Marae, i Whakatāne, i te 6 o Mei 2023
Ōtiria Marae, i Moerewa, i te 13 o Mei 2023
Raukawa Marae, i Ōtaki, i te 17 o Hune 2023
Papakura Marae, i Tāmaki Makaurau, i te 24 o Hune 2023

Ka whakaputa te rōpū me ngā pou tikanga i te aratohu/pūrongo/pukapuka hei urupare:

Tikanga Māori e pā ana ki te manatika: Arā, he pēhea te āhua o te pūnaha manatika tautuku tikanga? He aha ōna āhuatanga waiwai? Kia whai kiko, he aha ngā whāinga o te pūnaha manatika tūāpapa tikanga i te tau 2023, ā, haere ake nei?
Tikanga Māori e pā ana ki te tukanga: Arā, he aha ngā uara/mātāpono hei aronga mā te Taraipiunara ina hoahoa ana i te ruku tātari matua? Kia ōrite ki ngā tikanga o te matatika tūturu, me pēhea te Taraipiunara e whakahaere ai i te ruku tātari kia tautuku hoki ki ngā tikanga?

3. Te Tāhū o te Rau

Ko te wāhanga tuatoru - whakamutunga hoki - o te ruku tātari ko Te Tāhū o te Rau He ruku tātari tēnei ki ngā kerēme e pā ana ki te pūnaha ture taihara me te pūnaha kiri tangata manatika. Ka kī te Taraipiunara ka ruku tātari ki ngā heke, ngā kaupapa rānei i te whakaraupapatanga e whai ake nei:

Ngā kerēme e pā ana ki ngā pirihimana
Ngā kerēme e pā ana ki te whakahaere o ngā kōti taihara
Ngā kerēme e pā ana ki ngā whare herehere (tae atu ki te tuku tārewa) me te whakawhiu here kore
Ngā kerēme e pā ana ki ngā whakahaerenga ā-ture mō tekiri tangata i roto i te Kōti Takiwā me ngā kōti matua
Ngā kerēme e pā ana ki te Kōti Whānau
Ngā kerēme e pā ana ki te Kōti Taiao
Ngā kerēme e pā ana ki te Kōti Whenua Māori

Kei ngā wāhanga tōmua o te whakamahere ruku tātari Te Tāhū o te Rau. Kāhore e kawatauhia ana te tīmatanga o ngā takunetanga tūmatanui matua i mua i te tau 2024.

NGĀ TAKE MATUA E AROTAHITIA ANA

Claimant funding & legal aid

Tikanga Māori & justice

Criminal and civil justice system