I te Hepetema o 2018 i tuku te hea o mua i tētahi atu manatu e whakahou ana i te tukanga mō ngā kerēme o mua e toe ana. I whakamārama ia ka whakarōpūtia ngā takiwā ruku tātari Taraipiunara ki ngā rohe kia tukuna ki tētahi rōpū e tū ana, ā, ka kopou i a ia anō hei mana whakahaere mō tētahi ruku tātari rōpū e tū ana ki ngā kerēme o mua e toe ana i roto i te rohe o te Tonga o Te Ika-a-Māui me te Waipounamu. I te tau 2019 i kopou ia i a Dr Monty Soutar rāua ko Dr Robyn Anderson ki te rōpū. 

I muri i te tāoki o Kaiwhakawā Matua Isaac hei Hea, ka kopoua a Kaiwhakawā Terena Wara hei mana whakahaere mō te rōpū e tū ana. I kopoua anōtia he mema ruku tātari tokorua, ko Ron Crosby rāua ko Kevin Prime.

I whakatūria i te manatu o Hepetema 2018, te Ruku Tātari ki Ngā Kerēme o Mua e Toe ana: Ngā Kerēme mō te tonga o te Ika a Māui me Te Wai Pounamu (Wai 2800), ā, ka whai whakaaro ki ngā kerēme o mua e toe ana nō ngā takiwā ruku tātari e whai ake nei:

a) Taranaki;

b) Whanganui;

c) Te Whanganui-a-Tara;

d) Te Tau Ihu;

e) Murihiku; me

f) Rēkohu/Wharekauri.

Ā muri atu, ka whakawhānuitia atu pea te mana kōwhiri o tēnei rōpū e tū ana ki ētahi atu rohe, ka kopoua rānei ētahi atu rōpū e tū ana mō ētahi atu rohe.