He hou ngā mahi a Kahurangi Judith Binney hei tumu kōrero ki ngā kaupapa hītori Māori, Māori me te Pākehā, me ngā hononga i waenga i ngāi Māori me te Karauna. Nā ana mahi me ngā iwi, tana whakapāpā ki ō rātou hītori ā-waha, tuku iho hoki, me tana kōrerorero angitu i waenga i ngā ahunga kura wānanga ā-uru me ngā pūtake mātauranga Māori, i āwhina ki te panoni te āhua e whakaarohia ai ngā wā o mua e ngā tāngata nō Aotearoa. I tino whakaaweawe tana māramatanga ki tō mātou anamata tuari ki te mahi a te Rōpū Whakamana i Te Tiriti o Waitangi, e whānui ake i ngā hapori i pau tōna ao e tirotiro ana.
Otirā, ka maumaharatia a Kahurangi Judith mō ana mātai tino hou e rua: Ko Redemption Songs, te mātai i Te Kooti Arikirangi Te Turuki, tōna ao, ana karere me ana matakite, tae atu ki tana pāpātanga ki te hītori o Aotearoa; me Encircled Lands, tana mātai whakahirahira o te hītori o Tūhoe me te takaoraora roa, whakamamae hoki o ngā iwi o Te Urewera i te tāmitanga. Encircled Lands, ahakoa te tihi o ngā tau e mahi ana, ka tino tīmata i roto i tana pūrongo tirohanga whānui mō te ruku tātari a te Taraipiunara mō Te Urewera. Te hiranga o ngā mahi e rua ki ngā ruku tātari o te Rōpū Whakamana i Te Tiriti o Waitangi e kitea ana i te auau o te kōrerotia i roto i ngā pūrongo o te Taraipiunara mō ngā kerēme Tiriti o Tūranga, waenga o Te Ika-a-Māui, me Te Urewera.
E tino kitea ana te ngākau whiwhita me te pūkenga ngore ki ngā nohoanga marae i a ia e tuku ana i te taunakitanga o mua ki te Taraipiunara i mua i te aroaro o te iwi. Ka mōteateatia a Kahurangi Judith Binney, engari ka toitū tanga tukunga ihotanga ki te hītori o Aotearoa, ki te mahi hoki o te Taraipiunara.
Ua marangai te heke a roimata mōhou e te rau huia, e te piki kōtuku. Ko tō reo kua rārangahia ki te poutama, ki te kaokao o te whare kōrero o te Taraipiunara. Haere, takahia te ara a Tāne ki te huinga o te kahurangi, kia mihia koe e te hunga wheturangi; haere, whakaoti atu.
Ko ngā whetu ki te rangi, ko ngā takahanga waewae ki te whenua, tihei mauriora.