Kei ngā maunga whakahī, kei ngā wai tuku kiri, kei ngā mātāwaka o te motu, nei rā te mihi ki a koutou.
Ka tika me mihi ki te hunga kua riro atu ki te pō, ki ngā mate o tēnā iwi o tēnā iwi, e kore te aroha o rātou mā e waikuratia. Hoki ora mai ki tātou ngā waihotanga o rātou mā, tēnā koutou tēnā tātou. Me huri aku whakaaro i ēnei wā ki ngā pito o te motu kua pāngia e te huripari, auē te mamae me te ngaukino nei.
Kāti ake ka huri ki te kaupapa, e hika mā, nōku te hōnore ki te tuku i tēnei pānuitanga motuhake.
E te uri o Ngāti Rēhia, te uri o Ngāti Kurī tēnei uri o Ngā Puhi nui tonu, piki mai rā ki te pae whakawā, whakaeke mai ki te Te Kooti Whenua Māori ki Te Roopu Whakamana i Te Tiriti, whakatau mai rā ki tō tūranga hōu! E Alana Miriana Thomas, nau mai me ōu pūkenga maha hei hua mo ngāi Māori.
E koa ana au ki te whakapuaki i whakaūngia e te Minita Whanaketanga Māori te kopounga o Alana Miriana Thomas hei kaiwhakawā pūmau o te Kōti Whenua Māori. Ināianei ko Kaiwhakawā Thomas te Kaiwhakahaere ki Kaupare Law and
Consultancy, ā, kei a ia tētahi LLB, BA hoki nō te Whare Wānanga o Tāmaki Makaurau. E tino kaingākau nui ana a Kaiwhakawā Thomas ki te puritanga, te whakawhanaketanga me te whakatairangatanga o ngā āhuatanga katoa o te Ao Māori.
Ā kō ake nei, ka whakaūngia te rā o te hui oati, ā, ina oatihia ana ka noho ia ki Te Whanganui-a-Tara.
Ka tuku te Hōnore Willie Jackson, Minita mō te Whanaketanga Māori i te whakapuakitanga ōkawa i te 22 o Māehe 2023: He kopounga hou ki te pae o te Kōti Whenua Māori | Beehive.govt.nz(hononga o waho)
Āku whakamihi, me ngā whakamihi a te Kōti Whenua Māori, ki Kaiwhakawā Thomas. Ka hīkaka au kia whakatau ōkawatia a Kaiwhakawā Thomas i te tīmatanga o tana haerenga hei mema o te pae o te Kōti Whenua Māori.
Kua piki te manu ki te rangi, heoi anō tā tātau, te titiro pēwhea tōna rere.
Nō te pāpā Rangitihi Tahuparae tēnei kōrero.
Nāku iti nei
Chief Judge W W Isaac