Te Noho Ngātahi
Ko te Tiriti o Waitangi te pukapuka taketake o tō tātou motu.
I whakaae a ngāi Māori:
- kia noho tāngata kē i roto i tō rātou motu; ā
- kia waihanga tikanga ngā tāngata o Piritānia e pā ana ki te whanonga me te whakarite e whāia ana e ngā tāngata katoa.
I whakaae ngā tāngata o Piritānia:
- kia whakahaere a ngāi Māori i ō rātou anō ao; ā
- ka whakawhiwhia ki ngāi Māori ngā mōtika ōrite ki ērā atu tāngata i Aotearoa.
Whakaute
Ko te tikanga o te whakaute me whakaaroaro koe ki ētahi atu tāngata. Ehara te tikanga o te whakaute kia ōrite te tangata, kia pārekareka ki ngā kai ōrite, kia ngahau i ngā ngohe kotahi.
Ko te Tiriti he kirimana whakaute i waenga i ngā tāngata o Piritānia me ngāi Māori. Ināianei, he tokomaha te hunga e noho ana i konei, ā, kāhore ō rātou whānau i ahu mai i Piritānia. Ko te tikanga o te Tiriti me whakaute a ngāi Māori me tauiwi, tētahi ki tētahi.
He mea hira e whai whakaaro, e whakaute hoki ngā ture me ngā tikanga ki ngā ao o ngāi Māori me tauiwi. He mea hira e whakaaroaro ana a ngāi Māori me tauiwi e noho ngātahi ana, tētahi ki tētahi me te whakaute i ō rātou rerekētanga.
Whakapono
Ka angitu anake te kirimana mēnā e whakapono ana ngā rōpū e waitohu ai, ka mahi te rōpū kē e waitohu ana i te kirimana i ngā mahi e kī ana rātou.
I whakapono te hunga Māori i waitohu i te Tiriti ka waihanga te hunga o Piritānia i ngā ture pai mā rātou me ngā tāngata whai. Engari, pērā i te hītori o Taranaki, he pai ngā ture mā te Kāwanatanga me ngā tāngata whai, engari kāhore i te pai mā ngāi Māori.
Te Rōpū Whakamana i Te Tiriti o Waitangi
Mai i te waitohutanga o te Tiriti, i te haere a ngāi Māori ki te Kāwanatanga, i konei, ā, i Piritānia anō hoki, ki te kōrero mō te whakahōnore i te kirimana o te Tiriti. Ināianei, kei a tātou te rōpū Whakamana i te Tiriti o Waitangi. Ka mātai te Taraipiunara i ngā kerēme Tiriti e pā ana ki ngā mahi a te Kāwanatanga i mua kāhore i te pai mā ngāi Māori. Ka taea hoki te tuku kerēme mō ngā mahi a te Kāwanatanga ināia tonu nei. Ehara i te mea mō te whenua anake ngā kerēme ki te Rōpū Whakamana i Te Tiriti o Waitangi. I tuku kerēme a ngāi Māori mō te Kāwanatanga e whakaae ana i te parahanga o te moana, ngā awa, te hau takiwā, me te whenua. Kua tuku i ngā kerēme mō ngā ture hī ika, te reo Māori, me te mātauranga.
I muri iho i te rongo a te Rōpū Whakamana i Te Tiriti o Waitangi ki te kerēme, ka whakatau mēnā nā te mahi o te kāwanatanga o mua, te Kāwanatanga onāianei rānei, i takahi te oati i roto i te Tiriti. Ki te whakatau te Rōpū Whakamana i Te Tiriti o Waitangi i takahi te Kāwanatanga i te oati Tiriti , ka marohi ki te Kāwanatanga me pēhea te whakatikatika. I ētahi wā, me whai te Kāwanatanga i ngā marohi a te Rōpū Whakamana i Te Tiriti o Waitangi.
Me pēhea te Whakatikatika i ngā Hē
E whakamātau ana te Kāwanatanga, a ngāi Māori, me te Rōpū Whakamana i Te Tiriti o Waitangi ki te whakatikatika i ngā hē i puta mai hei putanga o te takahitanga o ngā oati Tiriti. E whakamātau ana rātou ki te waihanga i te anamata pai ake mā ngāi Māori, ā, e whakamātau ana ki te waihanga i te māramatanga pai ake i waenga i ngāi Māori me te Pākehā.
Ināianei, he nui ngā whenua i tangohia hētia i ngāi Māori e puritia ana e tauiwi. He kino anō hoki te tango anō i taua whenua i aua tāngata me te whakahoki ki ngāi Māori. Me kōrero te Kāwanatanga ki ia rōpū ā-iwi me tētahi āwangawanga e pā ana ki te Tiriti. Me kimi te Kāwanatanga me ngāi Māori i te whakatikatika o te raruraru e tōkeke ana mā te katoa, a ngāi Māori me tauiwi.
Te Whakatau Ngātahi
I mua, kāhore i whakaarohia he hoa rangapū te Māori me te Kāwanatanga, pērā i te oati o te Tiriti. Ināianei, e whakamātau ana te Kāwanatanga ki te ārai i te aranga o ngā raruraru hou i waenga i ngāi Māori me te Kāwanatanga mā te whakatūturu e whai wāhi ana ngā iwi ina waihangatia ana ngā ture me ngā whakataunga hira.
