Ko Susy Frankel, FRSNZ, tētahi ahorangi o te ture me te hea o te mana whakairo hinengaro me te ture hokohoko ā-ao ki te Whare Wānanga o Te Herenga Waka. Ka mutu ana te mahi hei rōia i Aotearoa me Piritānia, ka uru a Susy ki te Wāhanga o te Ture i Te Whare Wānanga o Te Herenga Waka i te tau 1997, ā, i te tau 2008 ko ia te wahine tuatahi i whakatairangahia hei tino ahorangi i roto i te wāhanga. Kātahi ka āwhina ia i te Kaiwhakawā Matua o taua wā, i a Joe Williams me te rōpū Taraipiunara hei kaiwawao akoako i roto i tō rātou ruku tātari ki te kerēme Wai 262. Mai i te tau 2008 ki te 2020, ko ia te hea o te Taraipiunara Manatārua, ā, mai i te tau 2015 ki te 2017 ko ia te perehitini o te Advancement of Teaching and Research in Intellectual Property. Ko ia te hoa kaiwhakahaere o te Pokapū o te Ture ā-Ohaoha ā-Ao o Aotearoa ki te Whare Wānanga mai i tana tīmatanga i te tau 2007. I whakaako ia i roto i ētahi kura ā-ture i tāwāhi, tae atu ki te tau 2020 hei ahorangi ā-ao ki te Kura ā-Ture ki te Whare Wānanga o Niu Ioka. Ka arotahi tana akoranga ki te mana whakairo hinengaro ā-ao me tana hononga ki te whakahaumaru o te mātauranga me te aronga hou o ngā iwi taketake me te hononga i waenga i te mana whakairo hinengaro me te hokohoko ā-ao. I te tau 2018, i pōtihia ia hei Hoa o Te Apārangi. I kopoua a Ahorangi Frankel ki te Taraipiunara i te 2020.