I te tau 1840, ka tono a Ngāti Whātua o Ōrākei i ngā tāngata whai Pākehā kia tuari i te whenua. I hiahia a Te Kawau, tō rātou ariki, kia tāpae i te manaakitanga, engari i hiahia hoki ia kia whai i te whakahaumaru hei ārai i iwi kē, otirā ngā iwi o Te Tai Tokerau me ā rātou pū. Nā reira, i te Pēpuere o 1840, ka haere a Te Kawau me ētahi rangatira tokoono ki te Pēwhairangi kia tono i te Kāwana Hopihona kia haere mai ki te noho tahi me rātou, ko te kimi whakahaumaru i ō rātou hoariri tētahi take. I te 20 o Māehe, i waitohu a Te Kawau me ētahi atu rangatira o Ngāti Whātua o Ōrākei i te Tiriti o Waitangi. I te Hepetema, i whakarewaina te pouhaki o Piritānia ki tētahi wāhi, ārā, ko te tihi o te Tiriti o te Kuini i tēnei wā, ā, ka huri a Tāmakimakaurau hei tāonenui matua o Aotearoa.
I whakaae Ngāti Whātua Ōrākei ki te tuku i tōna 3,000 mano eka whenua hei whakatū i tētahi tāone. Ko te tikanga, ka whakaritea ngā taipitopito o te hokonga o te whenua i muri mai. I ngā tau ki muri, he maha ngā wā ka whakahaumaru te hapū maungārongo, piripono, hāpai ture i te nōhanga hou o Tāmakimakaurau ki ngā iwi urutomo.
I tuku a Ngāti Whātua i ētahi atu koha o te whenua. I te tau 1858, ka tuku rātou i te whenua i Ōrākei ki te Hāhi Mihinare mō tētahi whare karakia me tētahi kura hoki. I te tau i muri mai, ka tuku rātou i te kūrei ki Ōrākei, te pito o Takaparawhā, ki te Karauna hei pou wawao kia ārai i te urutomo a Rūhia e uruwehia ana. Ka tukuna atu te whenua i runga i te herenga ka whakahokia mēnā kāhore tonu i te hiahiatia. Koinei tētahi wāhanga o te tikanga Māori o te tuku i ngā takoha ki ngā hoa.
Ina piki ai te nui o ngā tāngata whai e taetae mai ana, ka piki haere te whenua e hiahiatia ana. He mano eka i hokona e Ngāti Whātua Ōrākei ki te Kāwanatanga, nāwai rā, ka hipa ngā tau, ka hokona ki ngā tāngata whai tūmataiti. Kāohre e kore i whakapono te iwi ko te tikanga o ēnei hoko nō ngā hunga e rua, arā nō rātou me te kaihoko ngātahi te whenua. I muri iho, ka whakatau a Kāwana Kerei kāhore i te tika kia hokona te maha o te whenua ki ngā tāngata whai tūmataiti, nā reira i hokona, i tangohia rānei te whenua e te Karauna, me te kore utu paremata.
Ka utu te Karauna i te £341 mō te whenua tuatahi i tukuna atu mō te nōhanga (3,000 eka). Ka hipa te ono marama, ka hokona anōtia te 44 eka e te Kāwanatanga ki ngā tāngata whai mō te £24,275. Ka whakamahia te moni hei waihanga rori, arawhata, hōhipera, me ētahi atu ratonga mō te tāone hou. Ka utua te whanaketanga moata o Tāmakimakaurau ki ngā huamoni nō te hokonga o te whenua ā-iwi o Ngāti Whātua Ōrākei.
Mai rā ānō, he mārama te kōrero a Te Kawau, kāhore e hokona te poraka o Ōrākei me ōna 700 eka. Ka tāpuia ki te puritanga ā-iwi mō Ngāti Whātua Ōrākei mō ake tonu atu. I te tau 1854, 14 tau anake i muri iho i tō rātou tāpaetanga whenua mō Tāmakimakaurau, koinei te whenua anake nō te hapū. Ko Ōrākei tō rātou 'whawhai whakamutunga'.
