Waipoua 2 (e mōhiotia ana hoki hei tāpui Iwi Taketake o Waipoua) te poraka whenua i whakaaetia e ngā rangatira e rua, e Tiopira rāua ko Parore, ka noho hei whenua tāpui ā-iwi mō Tiopira. Tae atu ki te ngāherehere kauri, i kapi i ngā eka 12,220. Nā te mea, i rēhitatia te whenua ki te Native Land Court, kua kore e noho ana i raro i te whakahaere o te iwi, ā, ka taea te rūri ki ngā pūhera iti motuhake, me tētahi 'kaipupuri whenua' takitahi. He ngāwari ake mā te Karauna e hoko.
I te Hūrae o 1917, ka kī te Kāwanatanga, mēnā i hiahia ngā kaipupuri whenua o te whenua tāpui iwi taketake o Waipoua ki te hoko i ō rātou whenua, ka taea anake te hoko ki te Kāwanatanga. Ka hipa ētahi tau, ka hoko te Karauna i tēnā wāhanga o te whenua, i tēnā wāhanga o te whenua. I te wā i tāwāhi ngā kaipupuri whenua Māori maha e whawhai ana i te Pakanga Tuatahi o te Ao, i whiwhi ngā kaiwhakarite a te Karauna i ngā whakaaetanga kia hoko i ngā tāngata i noho ki te kāinga. I te hokinga mai o ngā kaipupuri whenua ki te kāinga i te pakanga, i kite rātou kua hokona ō rātou whenua.
Tae noa ki te tau 1923, neke atu i te 6113 eka i hokona e te Karauna. I whakatau te Kāwanatanga e hia te utu mō te whenua, ā, i ētahi wā i whakatau i runga i ngā uara whenua tawhito. Kāhore te uara o te papa rākau taketake i runga i te whenua i whakaurua ki te utu, ā, kāhore hoki i whakaurua ngā whare. I tope te Kāwanatanga i te papa rākau, i whakatō anō i te whenua ki te ngāherehere paina, i hoko rānei mō te mahi pāmū, ā, i whiwhi ki te huamoni nui rawa.
I waenga i te tau 1939 me 1945, i hokona ngā eka 4,734 anō e te Karauna. I tēnei wā i te whawhai te nuinga o ngā tāne o Te Roroa ki tāwāhi i roto i te Pakanga Tuarua o te Ao. I tuku hoki Te Roroa i te whenua ki te Karauna mō tētahi kura kia whakatūria ki Waipoua.
I te tau 1972, ka kī te Kāwanatanga e taea ana te hoko i te whenua ki ngā tāngata katoa. I waenga i ngā tau 1960 me 1973, i whiwhi te Karauna ki ngā eka 450 anō. E 690 anake ngā eka i noho tonu hei whenua Māori o ngā eka 12,220 i whakaritea hei whenua tāpui i te tuatahi. Waihoki, he puritanga takitini tēnei, kaua ko te whenua tāpui o te iwi pērā i te tūmanako o Tiopira.
