I makihuhunu ngā kaiwhakarite Karauna i te taupatupatu i waenga i ngā rangatira tokorua nei, ko Tiopira rāua ko Parore, e pā ana ki te puritanga o te poraka Waipoua-Maunganui. I te wā o te rūritanga, i whakawehe te Karauna i te whenua ki ngā poraka motuhake e rua. Kātahi ka whakaae ngātahi ngā rangatira mā Tiopira te poraka o Maunganui, ā, mā Parore te poraka o Waipoua. Ko te takiwā e mōhiotia ana hei Waipoua 2 ka huri hei whenua tāpui māori e puritia ana e Tiopira. Nā te Native Land Court i ōkawa ai tēnei whakaaetanga, ā, i whakaingoa i ngā kaipupuri whenua 10, tae atu ki ngā rangatira e rua, mō ia poraka. Kātahi ka mahi takitahi te kaiwhakarite hoko whenua a te Karauna i tēnā kaipupuri whenua, i tēnā kaipupuri whenua. Tuatahi, i tono ia i a Tiopira kia waitohu i ngā tītī hoko i mua i te tuhinga o te utu hoko i runga. Kātahi, mā te tāpae i te utu nui ake, i whakawhere i te tangata manauhea nei, i a Parore ki te hoko, ā, i tuhi i te utu nui ake i roto i te tītī. I utu ia i te tamana £500 ki a Parore kia whakawhere i a ia ki te hoko, ā, i tuku ki a ia tētahi whenua tāpui, he wāhi hī tuna 250 eka ki te Roto o Taharoa i runga i te poraka o Maunganui.
I te whāwhai te Karauna, ā, kāhore i tika te rūri i te whenua i mua i te urunga o te hoko ki te Native Land Court . He whakaaetanga ā-waha i waenga i ngā rangatira me ngā kaiwhakarite hoko kāhore e hokona ētahi wāhi tapu tauwhāiti i runga i te poraka o Maunganui, engari ka pupuritia tonutia hei whenua tāpui Māori. Heoi anō, i te rūritanga o taua poraka, ka tuhi ngā kairūri Pākehā i ngā rārangi tōtika i runga i te mahere, ā, kāhore i whakamahia ngā tohu rohenga pērā i ngā tohu whenua me ngā awa, ā, i mahue ētahi o ngā whenua tāpui takune i ngā rārangi.
I rūritia motuhaketia ngā whenua tāpui e rua, Manuwhetai me Whāngaiariki ki tētahi mahere motuhake. Engari, kāhore i whakaurua tēnei rūritanga hei wāhanga o te mahere i tāpirihia ki te tītī hoko. Nā reira i whakauru ai a Manuwhetai me Whāngaiariki hei wāhanga o te whenua i hokona ai. Ka hokona te Paripari o Maunganui nā te mea kāhore i rūritia, nā reira, kāhore i puta i runga i te mahere hei whenua tāpui. Kāhore Te Roroa i mōhio kua hokona ō rātou wāhi tapu kia hipa ētahi tau, i te wā i whakawehea te whenua e te Karauna, ā, i hokona anōtia ai.
E whakaatu ana te mahere tāpiri [GIF, 155 KB] i ngā takiwā i kawatau kia tāpuia, ā, e hia te whenua i tāpuitia tūturutia.
