I te wā o ngā hokonga whenua mai i ngā 1870, he maha ngā taonga i ngaro, i tūkinotia rānei. He maha ngā wāhi tapu i tangohia i te puritanga ā-iwi, i whakakinohia me te takahia rānei mā ngā hokonga whenua, te nōhanga, me ngā whakawhanaketanga hou. He maha ngā wāhi tapu i huri hei whenua pāmu tūmataiti, hei wāhanga rānei o ngā ngāherehere Kāwanatanga, i whakatōngia ki ngā rākau nō tāwāhi hei kōporo rānei. I hokona ētahi takiwā kē hei wawaetanga whare takutai.
I tūhuratia ētahi o ngā wāhi tāpukenga tapu, ā, i pāhua i roto i ngā tau. I hokona, i haria rānei ki ngā whare taonga ngā kōiwi tangata me ngā taonga tapu pērā i ngā waka tūpāpaku, i reira i whāwhātia, i mātaihia e ngā kaipūtaio me ētahi atu, ahakoa kāhore anō kia hīkina te tapu. He nui te ngaukino me te pūkatokato ki Te Roroa, nā te mea ka takahia ngā taonga tapu nei ina whāwhātia pērātia ana e ngā tauhou.
I te tau 1988, i whakahokia ētahi o ngā taonga tino tapu o Te Roroa, ngā kōiwi me ngā waka tūpāpaku o ō rātou tūpuna ki a rātou i te Whare Taonga o Tāmakimakaurau kia tanumia anōtia.